ထေရဝါဒ ဗုဒ္ဓဘာသာ၏ အနှစ်သာရမှာ ကံ-ကံ၏ အကျိုးကို ယုံကြည်ခြင်းပင်ဖြစ်တယ်။ ကံဆိုသည့် ဝေါဟာရ၏ အဓိပ္ပာယ်ကို တိတိကျကျ နားမလည်သူများကတော့ ကံတရားကို ယုံကြည်သူများအား အပြစ်မြင်လေ့ရှိပါတယ်။ ကံကိုယုံပြီး ဆူးပုံမနင်းပါနဲ့၊ ကံချည်းပဲ မယုံပါနဲ့၊ ဥာဏ်နဲ့ ဝိရိယကိုလည်း အားကိုးပါဦး၊ ကံကို အားကိုးလွန်းတာ လူညံလူပျင်းတွေအလုပ်၊ ကံကိုချည်း လွှဲမချပါနဲ့ စသည် စသည်ဖြင့် ပြောလေ့ရှိကြပါတယ်။ တချို့သောလူများသည် ဘာမဆို သူတို့အရည်အချင်းကြောင့် သူတို့တော်လို့အောင်မြင်တာ၊ မကြိုးစားပဲ မအောင်မြင်နိုင်ဘူးရယ်လို့ တခြားသောကံအကြောင်း အထောက်အပံ့များကို မျက်ကွယ်ပြုလျက် လက်မထောင် ဂုဏ်ဖော်ကြွားဝါလေ့ရှိကြပါတယ်။
ကံဆိုသည်မှာ အလုပ်ပင်ဖြစ်တယ်။ မိမိတို့ ပြုလုပ်ခဲ့သော အလုပ်၊ ပြုလုပ်နေဆဲအလုပ်၊ ပြုလုပ်တော့မည့် အလုပ်မှန်သမျှသည် ကံပင်ဖြစ်တယ်။ ကောင်းမှုကံ၊ မကောင်းမှုကံတည်း ဟူသော အကြောင်းတရားပေါ် မူတည်ပြီး၊ ကံကောင်းခြင်းနဲ့ ကံဆိုးခြင်း ဆိုတဲ့ အကျိုးတရား ရရှိကြမှာဖြစ်ပါတယ်။ ကံဟုဆိုရာတွင် အတိတ်ကံနဲ့ ပစ္စုပ္ပန်ကံ နှစ်မျိုးစလုံးအပေါ် မူတည်ပါတယ်။ တချို့က မိမိတို့ကောင်းမှုကုသိုလ်များ လုပ်နေရက်သားနဲ့ အဆင်မပြေမှုများ၊ စိတ်ညစ်စရာများ တွေ့သောအခါ ကုသိုလ်ကောင်းမှု ကံတရားအပေါ် သံသယဝင်တတ်ကြပါတယ်။ အတိတ်ကံ၏ အကျိုးသက်ရောက်မှုကို ထည့်သွင်းစဉ်းစားဖို့ လိုပါတယ်။ တခါတရံ အတိတ်ကံ၏ အားကောင်းမှုသည် ပစ္စုပ္ပန်ကံအပေါ် လွှမ်းမိုးမှု ရှိတတ်ပါတယ်။ တချို့တချို့သော.လူများသည် မိမိတို့၏အတိတ်၊ ပစ္စုပ္ပန်ကံများကို ကောင်းမွန်အောင် အားမထုတ်ကြပဲ ပြသာနာတစုံတရာ တွေ့ကြုံရလေတိုင်း မိဘမောင်နှမများ၊ ဆွေမျိုးများ၊ ဘေးပတ်ဝန်းကျင်တို့ကို လက်ညှိုးထိုးအပြစ်တင်လေ့ရှိပါတယ်။ အမှန်စင်စစ် မည်သူမဆို မိမိတို့ ကြုံတွေ့ရသော အကောင်းအဆိုးများသည် မိမိတို့ ပြုခဲ့သော အကြောင်းအကျိုးကံများ အပေါ်မူတည်ပါတယ်။ ဤအချက်ကို ယုံကြည်သက်ဝင် လက်ခံကျင့်သုံးမှသာလျှင် မြတ်ဗုဒ္ဓ၏ အဆုံးအမကို လိုက်နာသူ သာဝကရယ်လို့ သတ်မှတ်နိုင်ပါတယ်။
တချို့သောလူများသည် မကောင်းမှုမှန်သမျှ ဆိုးဆိုးဝါးဝါးကျူးလွန်နေကြသော်လည်း အပြစ်တစုံတရာ မခံစားရပဲ လောကအလယ်တွင် ခေါင်းမော့ လည်ဆန့်ကာ မိုးမမြင်လေမမြင် ပျော်တပြုံးပြုံးနဲ့ ဘဝသံသရာ၏ နောက်ဆုံးစည်းစိမ်ကို စံစားနေကြပါတယ်။ အကြောင်းမှာ ၄င်းတို့၏ အတိတ်ကံကောင်းမှု အားကြီး လွှမ်းမိုးနေသေးလို့ ဖြစ်ပါတယ်။ ကောင်းသောကံ အရှိန်ကုန်သွားပါက အကုသိုလ်ကံ တလုံးတခဲကိုစုပြုံခံစားပြီး လောကငရဲကို ဘဝမကူးပဲ အရှင်လတ်လတ် ခံစားကြရမှာပါ။ ၄င်းတို့ ပြစ်မှား ကျုးလွန်ခဲ့သော အမှားများနှင့် ထပ်တူညီမျှသော တူညီသောအကျိုးတရားများကို ခံစားကြရမှာပါ။ လောကကံတရားဆိုတာ မျက်နှာမလိုက်သကဲ့သို့ ဈေးဆစ်လို့လဲ မရပါဘူး။ ငရဲမှာအပ၊ဝဋ်မှာအမြဲဆိုတဲ့စကားက အလကားပေါ်ပေါက်ခဲ့တာ မဟုတ်ပါဘူး။ အမှန်တရားစစ်စစ်ဖြစ်ပါတယ်။
ပြုသူအသစ်…. ဖြစ်သူအဟောင်း….
မည်သူမဆို မိမိတို့ပြုခဲ့သော မကောင်းမှုကံများ၏ ဝဋ်ကြွေးကို တနေ့နေ့တချိန်ချိန်တွင် ပေးဆပ်ရစမြဲပါ။ မိမိတို့.ခံစားသမျှ အကျိုးတရားများကို မတရားပါဘူးရယ်လို့ အယူခံဝင်လို့မရပါဘူး။ လောကနိယာမအရ ဖြစ်သမျှအကြောင်း အကောင်းချည်းမဟုတ် အဟောင်းချည်းပါပဲ။ အကြွေးဟောင်းများကို ပေးဆပ်သူများအနေနဲ့ သံသရာဝဋ်ကြွေးကင်းရှင်းစွာဖြင့် ဆက်လက်ရှင်သန် ရပ်တည်နိုင်သော်လည်း အကြွေးသစ်ယူသူ၊ အပြစ်ကျူးလွန် ရန်စ စော်ကားသူ၊ လူရမ်းကားတို့မှာတော့ လူ့လောကဇာတ်ခုံတွင် မျက်နှာမဖော်ဝံ့ လူ့ချဉ်ဖတ်ဖြစ်ကြယုံသာမက သံသရာတလျှောက်တွင်လည်း ဘယ်တော့အခါမျှ မပေါ်နိုင်သော မြှပ်ခြင်းမျိုးဖြင့် စုန်းစုန်းမြှပ်ကြရတော့မယ်ဆိုတာ၊ သဘာဝကံတရားက မျက်နှာမလိုက် အပြစ်ဒဏ်ချမယ်ဆိုတာ နားလည်သဘောပေါက်ထားကြရမှာပါ။ ကံဆိုသည့် တန်ပြန်အကျိုးသက်ရောက်မှု မှန်သမျှကို လူမျိုးမရွေး ၊ဘာသာမရွေး၊ အဆင့်အတန်းမရွေး၊ အသက်ကြီးငယ်မရွေး၊ မည်သူမဆို စံစား ခံစားကြရမှာဖြစ်ပါတယ်။.....။
No comments:
Post a Comment