ရှင်ဗုဒ္ဒက မိန့်မှာခဲ့တယ်။ လူ့ဘဝဆိုတာ ရခဲတယ်တဲ့။ မိုးပေါ်ကကျတဲ့ အပ်တစင်းနဲ့ မြေပေါ်က ပစ်လိုက်တဲ့ အပ်တစင်းထိတွေ့ဖို့ လွယ်ကောင်းလွယ်မယ်။ လူ့အဖြစ်ရဖို့ လူပြန်ဖြစ်ဖို့က မလွယ်တော့ဘူးတဲ့လေ။ လူပြန်ဖြစ်ဖို့ အခွင့်အရေးက ဘယ်လောက်တောင် နည်းသလဲ ဆိုရင် ကမ္ဘာပေါ်မှာ ရှိတဲ့ မြေထုနဲ့ နှိုင်းစာရင် လက်သည်းခွံပေါ်မှာ ရှိတဲ့ မြေမှုန်လောက်ပဲ လူပြန်ဖြစ်ဖို့ အခွင့်အလမ်း ရှိတယ်တဲ့။ အဲဒီလိုဆိုတော့ တချို့လူကပ်တွေက စောဒကတက်ကြတယ်။ လူပြန်ဖြစ်တာ လွယ်လွန်းလို့ တချို့ နိုင်ငံတွေမှာ လူဦးရေ ထိန်းချုပ်တဲ့ အစီအစဉ်တွေ လုပ်နေရပါတယ်လို့လေ။ တကယ်တမ်းအသေအချာ စဉ်းစားကြည့်ကြပါ။ အသေးငယ်ဆုံး ပုရွက်ဆိတ်ကနေ အကြီးမားဆုံး ဆင်အထိ ရှိတဲ့ တိရိစ္ဆာန်ဦးရေနဲ့ နှိုင်းယှဉ်ရင် လူဦးရေက အဆပေါင်းများစွာ နည်းပါးလှပါတယ်။ ဒါက မျက်စိနဲ့ မြင်လို့ရတဲ့ အပယ်ဘုံသားအရေအတွက်ပဲ ရှိသေးတယ်။ မျက်စိနဲ့ မမြင်နိုင်တဲ့ အပယ်ဘုံသားတွေနဲ့ ပေါင်းလိုက်ရင် ဘယ်လောက်တောင်များလိုက်မလဲမသိဘူး။
ရှင်သန်ခြင်းအမျိုးမျိုးရှိတဲ့အထဲမှာ လူအဖြစ်နဲ့ ရှင်သန်ခြင်းဟာ အကောင်းဆုံးနဲ့ အမြင့်မြတ်ဆုံးပါဘဲ။ လူရယ်လို့ ဖြစ်လာရင်တော့ လူ့တန်ဖိုးတခုခုကို အရယူမှသာ လူဖြစ်ရကျိုးနပ်ပါလိမ့်မယ်။ အဲဒီလိုမဟုတ်ဘဲ အိပ်လိုက် စားလိုက် ကာမဂုဏ်ခံစားလိုက်နဲ့ ဘာတန်ဖိုးမှ မရှိဘဲ လူ့ဘဝကို ပြန်လည်စွန့်ခွာ သွားမယ်ဆိုရင်တော့ ဘဝမှာ အရှုံးကြီး ရှုံးမှာသေချာပါတယ်။ နောက်ထပ်လူဖြစ်ဖို့ မသေချာတဲ့ အခြေအနေမို့ လူဖြစ်တုန်းခဏတာမှာ အဓိပ္ပာယ်ရှိရှိ ဘဝကို ရင်ဆိုင်သင့်ပါတယ်။ လူအဖြစ်နဲ့သာ မြင့်မြတ်တဲ့ မည်သည့်ဘဝကို မဆို ရယူနိုင်တာပါ။ ချမ်းသာအမျိုးမျိုးရှိတဲ့အနက် အကြီးကျယ်ဆုံး အမြင့်မြတ်ဆုံးဖြစ်တဲ့ နိဗ္ဗာန်ချမ်းသာကို လူ့ဘဝမှာသာ ရယူနိုင်တာပါ။
အသက်ရှင်နေတုန်းကာလမှာ ရှင်သန်ခြင်းကို တန်ဖိုးမထားတတ်ဘဲ နေချင်သလိုနေ လုပ်ချင်တာလုပ်ပြီး ဘဝကို အကျိုးမဲ့ ဖြုန်းတီးတတ်သူများသည် သေရာညောင်စောင်းရောက်တော့မှသာ အကြီးအကျယ်နောင်တ ရတတ်ကြပါတယ်။ တချို့သောသူများသည် လောကဓံကို ကြံ့ကြံ့ခံ မရင်ဆိုင်နိုင်သောအခါ ရခဲလှတဲ့ လူ့ဘဝကို အလွယ်တကူ အဆုံးသတ်လေ့ရှိကြပါတယ်။ ဒါဟာ အင်မတန်မှားယွင်းတဲ့ လုပ်ရပ်ဖြစ်ပါတယ်။ ရှင်သန်ခြင်းကို ခပ်ပေါ့ပေါ့ သဘောထားပြီး သေခြင်းတရားကို အလွယ်တကူလက်လွယ်သူများသည် စိတ်ဓာတ်ပျော့ညံ့သောသူများ၊ ဘဝကို အလွယ်တကူအရှုံးပေးသောသူများ နှင့် လူ့ဘဝတန်ဖိုးကို မသိနားမလည်သူများသာ ဖြစ်ပေလိမ့်မည်။ လူ့ဘဝတန်ဖိုးကို နားလည်သူများသာလျှင် ရှင်သန်ခြင်း၏ တန်ဖိုးနှင့် သေဆုံးခြင်း၏ဆုံးရှုံးမှုများကို သဘောပေါက်လက်ခံပေလိမ့်မည်။ဘယ်တော့မှ ပြန်လည်မရနိုင်သော၊ ပြန်လည်ရရှိရန်ခက်ခဲသော၊ မြင့်မြတ်လှတဲ့ တန်ဖိုးဖြတ်လို့မရတဲ့ လူ့ဘဝကို အကျိုးရှိရှိ အသုံးချမှသာလျှင် လူဖြစ်ရကျိုးနပ်ပေလိမ့်မည်။--------------။
.
.
No comments:
Post a Comment