ဘုရားဌာပနာ နှလုံးသားမှာ...

မြတ်စွာဘုရား ပရိနိဗ္ဗာန်စံပြီးနောက် မြတ်စွာဘုရား၏ ကိုယ်စား၊ ရတနာသုံးပါးကို ဦးထိပ်ထားလျက် စေတီတော်များတည်ထား ကိုးကွယ်လာကြပါသည်။ စေတီ အမျိုးအစားလေးမျိုးရှိပါသည်။ ဓာတုစေတီ၊ ဓမ္မစေတီ၊ ဥဒ္ဒိဿစေတီ၊ ပရိဘောဂစေတီ ဟူ၍ လေးမျိုး သတ်မှတ်ထားပါသည်။

ဓာတုစေတီ။ ။ ဘုရားရှင်၏ ဓာတ်တော်၊ မွေတော်များ၊ ရဟန္တာများ၏ အရိုးဓာတ်တော်များ ဌာပနာထားလျက် တည်ထားသောစေတီ

ဓမ္မစေတီ။ ။ ဘုရားရှင်ဟောကြားတော်မူခဲ့သော ဝိနည်း၊ သုတ္တန်၊ အဘိဓမ္မာ စသော တရားပိဋကတ်တော်များကို၊ ရွှေပြား၊ ငွေပြား၊ ကြေးပြားများပေါ်တွင် ရေးသားထွင်းထုပြီး ဌာပနာထားလျက် တည်ထားသော စေတီ။

ဥဒ္ဒိဿစေတီ။ ။ ဘုရားရှင်၏ ကိုယ်ပွား ရုပ်ပွားတော်များကို အုတ်၊ ကျောက်၊ ကြေး၊ သစ်သားတို့ဖြင့် ထုဆစ် သွန်းလုပ်ပြီး ဌာပနာထားလျက် တည်ထားသောစေတီ။

ပရိဘောဂစေတီ။ ။ ဘုရားရှင်နှင့်တကွ သံဃာတော်များ၏ အသုံးအဆောင်များဖြစ်သော သင်္ကန်း၊ သပိတ်တော်များနှင့် ဗောဓိပင်၊ ရုပ်ပွားတော်များ ကိန်းဝပ်စံပယ်ရာ ပြဿဒ်၊တန်ဆောင်းများ ဌာပနာထားလျက် တည်ထားသောစေတီ။

တချို့သော စေတီတော်များသည် စေတီလေးမျိုးစလုံးနှင့် သက်ဆိုင်နေတတ်ပြီး၊ တချို့စေတီတော်များသည် တမျိုး သို့မဟုတ် နှစ်မျိုးနှင့်သာ သက်ဆိုင်နေတတ်ပါသည်။

ရွှေ၊ ငွေ ရတနာများသည် ဘုရားဌာပနာ ထိုက်ပါသလား… ရှေးခေတ်အခါက ဘုရားစေတီတည်သူများသည် ဘုရားစေတီများ ရေရှည်တည်တံ့စေရန် နှင့် ကြည်ညိုဖွယ်ဖြစ်အောင် ပြုပြင်ထိန်းသိမ်းနိုင်ရန်အတွက် နောင်ကာလတွင် ထုခွဲရောင်းချ သုံးစွဲနိုင်စေရန် ရွှေ ငွေ ရတနာများ စုဆောင်းထားရှိ ချန်ရစ်ထားခဲ့လေ့ရှိပါသည်။ သို့ရာတွင် ကာလရွေ့လျောလာသောအခါ ရွှေ ငွေ ရတနာများကိုပါ ဘုရားဌာပနာရာတွင် ထည့်သွင်းလာကြသော အလေ့အထ ဖြစ်လာကြပါသည်။

အကျိုးနှင့်အပြစ် ချိန်ထိုးကြည့်… ရွှေ ငွေ ရတနာများ ဌာပနာခြင်းသည် ရတနာသုံးပါးဖြစ်သော ဘုရား၊ တရား၊ သံဃာ စသည်တို့နှင့် မအပ်စပ် သင့်လျော်မှု မရှိခြင်း၊ စေတီအမျိုးအစား လေးမျိုးစလုံးနှင့် သက်ဆိုင်မှုမရှိခြင်း၊ လိုချင်လောဘရှိသော လူများအား အပြစ်ရောက်စေခြင်းတို့အပြင် ဘုရားစေတီများ ပျက်စီးယိုယွင်းမှုကို ထိန်းသိမ်းပြုပြင်ရမည့်အစား၊ မြေကြီးထဲ အကျိုးမဲ့ မြုပ်နှံထားခြင်းသည် ဖြုန်းတီးခြင်းသက်သက်သာ ဖြစ်ကြောင်း၊ စဉ်းစားဥာဏ်ရှိသူတိုင်း သတိထား ဆင်ခြင်သင့်လှပါသည်။ ဘုရားစေတီဟူသည် လူသားတို့အတွက် စိတ်ချမ်းသာမှု၊ စိတ်အေးချမ်းမှုနှင့် စိတ်ဓာတ်ကုစားမှုကို ပေးစွမ်းစေနိုင်သော နေရာဋ္ဌာနဖြစ်လေသောကြောင့် အစဉ်အမြဲ ကြည်ညိုဖွယ် ဖြစ်စေရန်အတွက် ပြုပြင်ထိန်းသိမ်းနိုင်ရန် အထူးလိုအပ်လှပါသည်။ ဤသို့မဟုတ်ဘဲ ရှေးရိုးစွဲ အယူအဆအတိုင်း အမှားကြာ အမှန်ဖြစ်နေသော အယူဝါဒများကို လက်မလွှတ်ဘဲ၊ ဆက်လက်ဆုပ်ကိုင်ထားမည်ဆိုပါက နောင်လာနောက်သားများ သည်လည်း အမှားကို အမှန်ထင်ပြီး၊ အကျိုးမရှိ အပြစ်များစွာနှင့် ဆက်လက်လုပ်ဆောင်နေပေလိမ့်မည်။

ဘုရားဌာပနာ နှလုံးသားမှာ….ထေရဝါဒ ဗုဒ္ဓသာသနာဟူသည် ယုံကြည်မှုသဒ္ဓါတရား သက်သက်နှင့် မဟုတ်ဘဲ ဝေဖန် ဆန်းစစ်နိုင်သော ပညာ ဥာဏ်နှင့်ပါ ယှဉ်တွဲနားလည် သိထားသင့်ပါသည်။ မြတ်စွာဘုရား ဟောကြားတော်မူခဲ့သော တရားတော်များသည်လည်း အတွေးအခေါ် ပညာဥာဏ်နှင့် စဉ်းစားနိုင်စွမ်းရှိသော သူများအတွက်သာ အကျိုးသက်ရောက်မှု ပိုမိုရရှိစေပါသည်။ အမှန်စင်စစ် မြတ်စွာဘုရား၏ အဆုံးအမသာသနာကို အတိအကျ လိုက်နာကျင့်သုံးနိုင်သူသည်သာလျှင် မြတ်ဘုရား၏ သာသနာအမြုတေကို ဌာပနာနိုင်သူ အစစ်အမှန်ဖြစ်နိုင်ပေမည်။

(ဘုရားစေတီတည်ရာတွင် ဂြိုလ်တိုင်များ၊ နေ့နံများ၊ တိရစ္ဆာန်ရုပ်ထုများ၊ တည်ထားထုလုပ်ခြင်းသည် ထေရဝါဒ စစ်စစ်မဟုတ်ကြောင်းနှင့် ဟိန္ဒူဝါဒမှ ဆင်းသက် ပုံကူးယူခြင်းဖြစ်ကြောင်းကို ပို့စ်သပ်သပ်တပုဒ်ရေးပါဦးမည်။)
.