အသိဉာဏ်ဆိုသည်မှာ... အကောင်းအဆိုး အကြောင်းအကျိုး... အမှားအမှန်များကို ကောင်းစွာ ဝေဖန် ပိုင်းခြား ဆင်ခြင် သိမြင်နိုင်ခြင်းကို ဆိုလိုပါသည်.....

Monday, June 8, 2009

ဟန်ဆောင်နေသော လူတန်းစားများ

လူတွေ ဘာလို့များ မရိုးသားကြတာလဲ။ ဘာလို့များ ဟန်ဆောင်နေကြတာလဲ။ ဟန်ဆောင်ရတာ မပင်ပန်းကြဘူးလား မသိဘူး။ တကယ်တော့ စိတ်ထဲရှိတာနဲ့ အပြင်လက်တွေ့ တထပ်တည်းကျတာ ဘယ်လောက်လွယ်ကူပြီး ဘယ်လောက် သက်တောင့်သက်သာရှိသလဲ။ မုသာဝါဒဆိုတဲ့ သီလကိုလဲ ထိန်းထားပြီးသားပဲလေ။ အသက်ကြီးလာလေ ဟန်ဆောင်ရတာ များလာလေလားတော့ မသိတော့ဘူး။ များသောအားဖြင့် အသက်ကြီးတဲ့သူတွေက ပိုပြီး ဟန်ဆောင်ကောင်းကြတယ်။ အကယ်ဒမီပေးဖို့တောင် ကောင်းတယ်။ ကလေးတွေကတော့ ဟန်မဆောင်တတ်ကြဘူး။ အရှိကိုအရှိအတိုင်း အရိုးခံအတိုင်း ဆက်ဆံတတ်ကြတယ်။

ဟန်ဆောင်လူတန်းစား - ၁

ကြည့်လိုက်ရင်တော့ လူကုံထံအသိုင်းအဝိုင်း၊ ငွေကြေးချမ်းသာပြီး အလှူအတန်းအလွန်ရက်ရောတယ်ပေါ့။ မျက်နှာက ပျားရည်လိုချိုပြီး သဘောကောင်းမနောကောင်းတဲ့ ရုပ်မျိုးပေါ့။ ဘာသာရေး အလွန်ကိုင်းရှိုင်းပြီး ဆွေစဉ်မျိုးဆက် ဘုရားတကာ ကျောင်းတကာ ရဟန်းဒါယိကာ ရဟန်းဒါယိကာမတွေပေါ့။ပြောလိုက်ရင်လဲ ဒါန သီလ ဘာဝနာ နိဗ္ဗာန် တပြားသားမှ မလျှော့ဘူး။ ဘုန်းကြီးဟောတဲ့ အတိုင်းမလျော့တဲ့ လေသံနဲ့ တရားတကယ်ရပြီး တကယ်တရားကျနေတဲ့ အပြောမျိုးတွေနဲ့ပေါ့။ တွေ့တဲ့ လူတိုင်းကိုလဲ သူ့လိုကျင့်ပြီး သူ့ကို အတုယူဖို့ ပြောလိုက်ရတာ အမောပေါ့။ မသိရင်တော့ မကြာခင်တောထွက်ပြီး စည်းစိမ်စွန့်တော့မယ့် အထာနဲ့ပေါ့။လူရှေ့ သူရှေ့မှာလဲ အညိုရောင်ထမိန်၊ အဖြူရောင်အင်္ကျီ၊ ယောဂီသဘက်နဲ့ လူမမာလိုလမ်းလျှောက်ပြီး နူးညံ့သိမ်မွေ့တဲ့ အမူအရာနဲ့ပေါ့။ အင်မတန်ရိုကျိုးတဲ့ ဟန်ပန်နဲ့ လူတိုင်းကို အောက်ကျိုးဆက်ဆံတဲ့ ပုံစံမျိုးပေါ့။ စေတနာ အရမ်းကောင်းတဲ့ ဂရုဏာရှင် သဏ္ဌာန်နဲ့ ပြာယာခတ်အောင်လဲ ဆက်ဆံတတ်သေးရဲ့လေ။

ဒါပေမဲ့လဲလေ လူဆိုတာ ဘယ်လောက်ကြာကြာ ဟန်ဆောင်နိုင်မှာလဲ။ ကြာကြာပေါင်းလေ အကြောင်းသိလေ၊ နာနာဝါးလေ ခါးမှန်းသိလေပဲလေ။ စကား စကားပြောပါများ စကားထဲက ဇာတိပြတဲ့။ ငွေ သိန်းပေါင်းသန်းပေါင်းချီပြီး ဘုရားတည် ကျောင်းဆောက် နေတဲ့ သူတွေက အိမ်က အိမ်ဖော်မလေးကို စေတနာမရှိဘူးတဲ့လေ။ ဒရိုင်ဘာကို ကတ်သီးကတ်ဖဲ့ လုပ်တယ်တဲ့လေ။ လူတွေကို ဟန်ပြကျွေးမွေးပြီး စေတနာရက်ရောပြနေသူတွေက ကွယ်ရာမှာ အလုပ်သမားတွေကို ထမင်းတနပ်တောင် မသထာဘူးတဲ့လေ။ လူရှေ့သူရှေ့ တရားဆွေးနွေးပြီး ကန့်လန့်ကာနောက်မှာ သူတပါးရဲ့ ဘဝကို ပျက်စီးအောင်၊ နှစ်ပြားမတန်အောင်၊ နစ်မွန်းစေအောင် လူရော စိတ်ပါ နှုတ်လဲ မကျန် စော်ကားမော်ကားပြောနေတာ၊ မဖြစ်နိုင်တဲ့ ဇာတ်လမ်းကို ဖန်တီးပြီး လူတကာကို သပုတ်လေလွင့်ပြောနေတဲ့သူတွေက ၊ ဘာသာခြားတွေ အထင်သေးအမြင်သေး ဖြစ်စေနိုင်တဲ့ ဗုဒ္ဓဘာသာဝင်တွေတဲ့လေ။ ပါးစပ်က ဘုရားဘုရား၊ လက်က ကားယားကားယား လုပ်နေတဲ့သူတွေကြောင့် ဗုဒ္ဓမြတ်စွာဘုရားရဲ့ ကြီးမြတ်လှတဲ့ ဂုဏ်သိက္ခာကို အားနာမိပါတော့တယ်။ ။

No comments: